ముంబై హైవేపై భయానక ప్రమాదం.. 250 కిలోమీటర్ల వేగంతో దూసుకెళ్లిన బీఎండబ్ల్యూ కారు బోల్తా!

మితిమీరిన వేగం ఇద్దరు యువతీయువకుల ప్రాణాలను బలితీసుకుంది. మహారాష్ట్రలోని ముంబై-వడోదర హైవేపై  బదలాపూర్ సమీపంలో ఆదివారం (జూన్ 21) తెల్లవారుజామున 3 నుంచి 4 గంటల మధ్య జరిగిన ఒక భయానక రోడ్డు ప్రమాదంలో విలాసవంతమైన 'బీఎండబ్ల్యూ జడ్4' స్పోర్ట్స్ కారు అదుపుతప్పి డివైడర్‌ను బలంగా ఢీకొట్టింది. ప్రమాద సమయంలో కారు గంటకు 250 కిలోమీటర్ల వేగంతో ప్రయాణిస్తున్నట్లు ప్రాథమిక నివేదికలు వెల్లడిస్తున్నాయి. ఈ హై-స్పీడ్ క్రాష్ తీవ్రతకు కారు గాలిలో పలుమార్లు పల్టీలు కొట్టి ముక్కలైపోయింది. వాహన శిథిలాలు, మృతుల శరీర భాగాలు ఘటనా స్థలానికి కొన్ని మీటర్ల దూరం వరకు చెల్లాచెదురుగా పడిపోవడం అక్కడి బీభత్సానికి అద్దం పడుతోంది.

ఈ ఘోర ప్రమాదంలో బదలాపూర్‌కు చెందిన యోగేష్ దిఘే (26), రికేబా జాకబ్ (24) అనే ఇద్దరు యువతీయువకులు అక్కడికక్కడే ప్రాణాలు కోల్పోయారు. కారులో ప్రయాణిస్తున్న ఆనంద్ అనే మూడో వ్యక్తికి తీవ్ర గాయాలు కాగా, ప్రస్తుతం అతడిని థానేలోని ఒక ప్రైవేట్ ఆసుపత్రికి తరలించి అత్యవసర విభాగంలో చికిత్స అందిస్తున్నారు. వీరంతా టిట్వాలా నుంచి బదలాపూర్ వైపు తిరిగి వస్తుండగా ఈ ప్రమాదం జరిగింది. స్నేహితుడి బర్త్‌డే పార్టీకి హాజరై అర్ధరాత్రి దాటాక అతివేగంగా కారు నడపడమే ఈ ఘోరానికి కారణమని తెలుస్తోంది. ఘటనా స్థలానికి చేరుకున్న పోలీసులు మృతదేహాలను స్వాధీనం చేసుకుని పోస్ట్‌మార్టం నిమిత్తం స్థానిక ప్రభుత్వ ఆసుపత్రికి తరలించారు.

ప్రస్తుతం బదలాపూర్ పోలీస్ స్టేషన్‌లో ఈ ఘటనపై ప్రమాదవశాత్తూ జరిగిన మరణాలుగా కేసు నమోదు చేసి అన్ని కోణాల్లోనూ దర్యాప్తు ప్రారంభించారు. డ్రైవర్ మద్యం మత్తులో వాహనాన్ని నడపడం వల్లే ఈ ప్రమాదం జరిగిందా? అనే కోణంలో పోలీసులు విచారణ జరుపుతున్నారు. శనివారం రాత్రి పార్టీ జరిగిన ప్రదేశంలో వీరు మద్యం తాగారా? లేదా? అనేది నిర్ధారించడానికి ఫోరెన్సిక్ బృందం సంఘటనా స్థలం నుంచి కీలక ఆధారాలను, బ్లడ్ శాంపిళ్లను సేకరించింది. పూర్తి స్థాయి నివేదిక వస్తేనే ప్రమాదానికి గల కచ్చితమైన కారణాలు తెలుస్తాయని పోలీసులు పేర్కొన్నారు.